Suohkan ávttji gájkka juohkusijt ja siebrijt organisasjåvnnånummarijn dåjmalattjat Giellavahkkuj oassálastátjit. Dát la buorre máhttelisvuohta tjalmostahttet julevsáme gielav ja kultuvrav dåjmajn ja ásadusájn, berustahtek stuorrudagás. Giellavahkkuj oassálastátjit máhttebihtit sáme gielav ja kultuvrav nannit bájkálasj sebrudagájn.
Majt máhttá duv juogos jali siebrre dahkat?
- Gåktu sámegielav guládallamijn adnet: Fármasta sáme moallánagájt ja báhkotsåmajt e-påstajn, næhttabielijn, sosiála medijján jali æjvvalimijn.
- Lágit dåjmajt: Plánit workshopajt, tjåhkanimijt, valástallam dåjmajt jali æjvvalimijt gånnå sámegiella ja kultuvrra la guovdátjin.
- Tjalmostahtte sáme kultuvrav: Hiervvit lanjájn sáme symbåvlåj ja bájnoj, jali dagá tiemáj milta dåjmajt ma åvdedi julevsáme kultuvrav.
- Juoge diedojt: Ane sosiála mediajt jali ådåsgirjátjijt gå juogada bæjválasj sámegielbágojt jali moallánagájt sebrulattjajda ja tjuovggijda.
Máhttelisvuohta rudájt oadtjot
Doarjjan giellavahkkuj gávnnuji rudá dåjmajda ma tjalmostahtti ja åvdedi sámegielav ja kultuvrav. Allit balá dårjav åhtsåt jus dujna li sjuggelis ájádusá gåktu giellavahkko máhttá ávvudaláduvvat dijá siebren!
Åtså dårjav ja sæbrrat
Giellavahkko l buorre máhttelisvuohta julevsámegielav ja kultuvrav tjalmostahttet mijá suohkanin, ja sávvap nav moattes gå máhttelis li siegen ávvudallamin. Åhtså biednikdoarjjagav, pláni dåjmajt, ja dagá ietjasa siebrev oassen dán ájnas giellavahkos!
Jus sidá ienep diedojt ruhtadoarjjaga birra jali ietjá ássjij birra, guládalá sáme rádevaddijn Lars Filip Paulsen, mæjlla: lars.filip.paulsen@hamaroy.kommune.no