Mij lip dáppe 2024

"Mij lip dáppe" le barggo rastá vuodoskåvlåj ja Hábmera kulturskåvlån tjavtjan 2024. Dássta sjaddá stuorra vuosádus gæhttjijda Hábmerhállan basádismánon 28.biejve., Tiebmá: Makkir máná, nuora ja ållessjattuga dálla årru Hábmerin? Gåsstå da båhti? Gåsi galggi? Makkir kultuvrraåvddånbuktema li sijájn?

Tjavtja miehtáj galggi gájka skåvllåoahppe 1. gitta 10. dássáj, Strávnjunje åhpadagán, Ájluovta skåvlån, Hábmera Montessoriskåvlån ja Badjesijda skåvlån oassálasstet biejve-barggoplánajda aktan dahkat vuosádussaj. Oahppe tjåhkani ájllegij rastá skåvlåj bargatjit duojna dájna dájddabargujn, ja oahpásmuvvat. Tækstatjuojggam, álmmuktjuojggam, gåvvå, tjállembarggo ja biejvvemanno Suoksavuomjávrráj li da dåjma majna mánáj- ja nuorajskåvlå oahppe galggi oassálasstet.

Sæmmi bále galggi kulturskåvlå oahppe musihka, dánsa, drámá ja lávlloma suorgijn gárvedit ja hárjjidallat repertoarav vuosádussaj. Duodjeoahppe aj oassálassti.

Duorastagá, basádismáno 28. biejve, sjaddá Hábmerhálla stuorra konsærttaarienán. 
Guokte vuosádusá tjadá, 700 gæhttjijda, gálggi gájka vuodoskåvllåoahppijt suohkanin, aktan vuodoskåvllåoahppe ja åhpadiddjij Hábmera kulturskåvlås, oahppe Hábmera ållessjattukåhpadusás, ja viehkedam mánájgárdijs ja jårggåskåvlås, vuosedit makkir mánáj, nuoraj ja ållessjattugij dálla årruv Hábmerin.

Dát tijmmalágásj vuosádus le musihkkaj dagádum, ja moattelágásj dájdalasj åvddånbuktemvuoge sjaddi; lávllom, dánssim, gåvvåvuosádus, akrobatihkka, tæksta, juojgos, subtsastallam ja ienep. 

Svein Schultz tjuojalvisáv dagátjit ja ásadittjat, aktan ietjas musihkkárijn Eirik Fjelde. Gájkka musihkka siednaduvvá live oahppijs ja åhpadiddjijs Hábmera kulturskåvlås. Sierra lávllomtjállemkursa tjadá, artistas Erling Ramskjell, li aj gålmmå Hábmera nuora dahkam almulasj lávllagav prosjæktaj.

"Mij lip dáppe" le stuorra ja rahtjalis prosjækta, suohkanin unnep gå 3000 viesádij,  subtsas Stine Braseth-Ellingsen, oajvve Hábmera kulturskåvlån ja "Mij lip dáppe" prosjæktajådediddje . 

Ulmme le oahpásmuvvat nubbe nuppijn, oassálasste galggi mihásvuodav oadtjot, gudi sij li, ja vuosedit stuorra gæhttjijda majt máhttep nahkat gå aktisattjat barggat. 

Hábmer le guhka suohkan. Vájku muhtem máná ja nuora tjåhkani bájkij rastá bállotjiektjam-, kulturskåvllå- ja ietjá doajmmafálaldagáj baktu, ij la dat dåhkkidahtte gájkajda.

Moattebelakvuohta le ávkken sebrudagán. Vissesvuohta dán birra le guovdátjin sihke bargovuogen prosjevtan ja guládallamsáhka vuosádusán. Gå gávnadip ja oahpásmuvvap nubbe nuppij duogátjijda ja kultuvrajda, de máhttep buoredit sebrudagáv, javllá Braseth-Ellingsen.

Prosjækta «Mij lip dáppe 2024» ruhtaduvvá Irisfoandas, Samfunnsløftet, Nordlánda fylkkasuohkanis, Hábmera suohkanis, BodøUNG2024, bájkálasj æládusiellemijs ja ietjá doarjjamáksijs.

Dán tjavtja vuoseduvvá bargov prosjevtas «Mij lip dáppe 2024» suohkana næhttabielen.