- Midjij la stuorra árvvo Sámedikke bivddemij, javllá kultuvrraskåvllårektåvrå Stine Braseth-Ellingsen. - Mij ávvudallap åvddånbuktet Hábmera kulturskåvlåv, ja aj åvdåstit sihke Hábmera suohkanav ja julevsáme guovlov.
Gåhttjom boahtá dan stuorra vuosádusá diehti Hábmerin basádismánon "Vi e’ her / Mij lip dáppe 2024". Vuosádus vuosedij Hábmer la sihke dáttja ja julevsáme suohkan, ja máná ja nuora suohkanin li badjelasj 20 iesjgeŋgalágásj rijkajs. Ållestjåhkanimjådediddje Tom Sottinen oassálastij vuosádallamij.
Rahpamin snjuktjamáno 11. biejve galggi kulturskåvlåoahppe 15 minuhta guhkkusasj prográmmav vuosedit, lávllagijn, musihkajn ja videojn, aktan ságastallamijn. Lávllaga galggi julevsámegiellaj ållåsit jali muhtem mudduj åvddånbuvteduvvat.
- Sámedikken galggap aj duodjevuosádusáv tsieggit, vuosedittjat majt kulturskåvlå oahppe li dahkam. Vuosádus galggá bihkusin liehket da niellja biejve gå ållestjåhkanibme vihpá. Sámedigge l juollodam rudájt Hábmera kulturskåvlåj garra- ja dibmaduodjáj, ja dát la vuogas máhttelisvuohta vuosedittjat konkrehta båhtusijt kulturskåvlå duodjefálaldagájs, javllá Braseth-Ellingsen.
Sámedikke ållestjåhkanibme l bajemus orgádna ja fábmudahka. Sámedikke ållestjåhkanime dåladuvvi niellji jahkáj.