Mij máhttá dáhpáduvvat?
Viessop ráfedis væráldin - duola degu dálkádakrievddamij, doaro ja digitála ájtoj diehti. Juska ienemus oasse Vuonan doajmmá gåktu galggá, de hæhttup gárvedit ássjijda ma midjij máhtti guosskat, degu garra dálkke, pandemijja, vahágisdáhpádusá, sabotásja ja ærámusát doarrodáhpádusá.
Dákkir hiehtedile máhtti buktet stuorra vájkkudusájt. Strávveboarkkanibme máhttá vájkkudit juhkamtjáhtjáj, kloáhkkasystiebmaj, máksemdievnastusájda, internæhttaj, mobijllatelefåvnnåj ja vejulasjvuohtaj biebmojt gárvedit ja málestit.
Nanni ietjat gergasvuodav!
Buorre iesjgergasvuohta l ájnas ietjat jasskavuohtaj ja duv lagámusájda. Jus tjuovo rádijt dán bagádusgirjátjin, de buorebut giehtadalá juohkkalágásj unnep ráfedisvuodav árggabiejven, ja aj stuoráp hiehtedilijt. Duodden viehkeda oajválattjajt vuorodit sijáv gudi ienemusát iehkev dárbahi.
Mujte val muhtem gárvedime li buorep gå ij mige!
Brosjyre om egenberedskap kan lastes ned på lulesamisk i pdf.
Mujttolissta iesjgergasvuohtaj
Vuollelin li buojkulvisá diŋgajda ma li vuohkasa ja ávkálattja sijdan. Bierri tjadádit ietjat dárbojt ja duolla dálla ådåsis gæhttjat ja duoddit duov dáv ietjat vuorkkáj. Mujte val famillja, rádna ja rádná máhtti aktan iesjgergasvuohtaj gárvedit.
Biebbmo ja tjáhtje
- Rájnas juhkamtjáhtje vuorkkidum gádnojda jali båhtålijda.
- Biebbmo mij gierddá vuorkkiduvvat ladnjatemperatuvran.
- Gássagoarddem, gássavuossjamapparáhtta jali primus.
- Duodde gássa jali boalldemus.
- Biebbmo ja tjáhtje goahteiellijda.
- Vehi rudájt ja moadda máksemkårtå.
Liegganibme ja tjuovgga
- Liegga biktasa ja gåbttjåsa, tæhppina jali oademvuossa.
- Stihkajt ja ginntalijt.
- Muorajt – jus dujna l muorravuodná jali pæjssa.
- Gássa- jali parafijnnavuodná majt sinna máhtá adnet.
- Sjiehtadus gånnå idjadit.
- Sålbbetjuovgajt jali ietjá tjuovgajt ma adni batterijjajt, jåråldagáv majna batterijjajt láddi jali biejvvesellaj.
Dálkkasa, hygiedna ja rájnasvuohta
- Dálkkasa ja vuostasjviehkkerustiga.
- Jodtablehta (mánájda ja ållessjattugijda gudi li nuorabu gå 40 jage, nissunijda gudi li iesselissan ja sidjij gudi njamádi).
- Gálvo rájnasvuohtaj ja hygiednaj, degu njuosskaserviehta, giehtasprijtta, rapsa, hivsikpáhper, libdiga ja tampåŋŋa.
Diedo
- DAB-radio mij doajmmá batterijjaj, jåråldagájn jali biejvvesellaj.
- Batterijja ja batterijjabáŋŋka mij la láddidum.
- Lissta páhperhámen ájnas telefåvnnånummarij, buojkulvissan hiehtetelefåvnnåj, váktadåktårij, judosdåktårij, berrahij, rádnajda ja rádnájda.
Sjekkliste for din egenberedskap på norsk kan lastes ned i pdf.
Tekst: DSB